Ibyumba bikonjesha (Firigo) bidakoresheje umuriro: Igisubizo kirambye kw'iyangirika ry'umusaruro w'imboga n'imbuto mu Rwanda

-

 

Muri iki gihe akanyamuneza ni kose k'ubahinzi nyuma yuko bejeje neza mu gihembwe cy'ihinga gishize cya 2024 A. Ubu umukoro usigaye ni uburyo bwo kuwubungabunga no kuwufata neza bawurinda kwangirika. Iyangirika ry'umusaruro mu Rwanda riracyari hejuru. Aho ku ibinyampeke riri hagati ya 5-10% mu gihe imboga n'imbuto rikiri hejuru cyane aho rirenga 30%. Amakoperative y'abahinzi b'imboga n'imbuto ndetse nama kompani yohereza umusaruro w'imboga n'imbuto mu mahanga ni bamwe mu bantu bazahazwa cyane n'igihombo giturutse kw'iyangirika ry'umusaruro. 

AGRIRESEARCH UNGUKA Ltd, kompani iri muziyoboye izindi mu Rwanda mu guteza imbere ubuhinzi binyuze mu guhanga udushya n'ikoranabuhanga ivuga ko nyuma yo kubona igihombo gikomeye abahinzi bahura nacyo kiva kwiyangirika ry'umusaruro no kuba ibyumba bikonjesha bisanzwe byifashishwa mu kugabanya iyangirika ry'umusaruro bihenze kandi bikagira n'uruhare runini mu gutera imihindagurikire y'ikirere, bakoreye abahinzi ibyumba bikonjesha bidakoresha amashanyarazi (umuriro) kandi ntibyangize ibidukikije. Ni ibyumba bikoresha ubuhanga bw'umwimerere mu gukonjesha bikoresheje umwuka usanzwe, amazi, n'amakara cyangwa umucanga mu ihame ry'ubugenge ryo gutumuka kw'amazi bikazana gukonjesha, nkuko bigarukwaho na Samuel NSENGIYUMVA, uhagarariye ubushakashatsi no guhanga udushya muri AGRIRESEARCH UNGUKA. 

Kuri ubu koperative KOTIBANYA iherereye mu karere ka Rubavu, Bazirete, koperative y'abahinzi b'imboga ifite abanyamuryango barenga 200 muribo abagera kuri 95% baka ari abagore, ni imwe muzo bamaze kubakira icyumba gikonjesha kidakoresha umuriro. Iki cyumba babubakiye gifite ubushobozi bwo kubika umusaruro w'imboga n'imbuto uri hagati ya Toni 3 na 5. Ibi byumba birahendutse cyane, biroroshye kubikoresha kandi ntibyangiza ibidukikije nkuko bibugwa na Innocent NIZEYIMANA, ushinzwe kwamamaza ibicuruzwa na serivisi muri AGRIRESEARCH UNGUKA Ltd. 

Abahinzi nabo batanga ubuhamya ko kuva batangiye kubikoresha byabafashije kugabanya iyangirika ry'umusaruro wabo ndetse n'inyungu babonaga ikiyongera.

Habumugisha J. D'amour, perezida w'iyi koperative avuga ko bari basanzwe bafite icyumba gikonjesha gikoresha umuriro ariko ko bari bamaze imyaka igera kuri itatu bahagaritse kugikoresha kubera igihombo bagiraga giturutse ku muriro mwinshi yakoreshaga. Avuga ko uretse kuba kuyigura bihenze cyane banishyuraga amafaranga y'umuriro agera ku 30,000 Rwf ku munsi mu gihe ubu bishyura 10,000 Rwf yonyine y'amazi ku kwezi ku buryo bushya bukonjesha bari gukoresha!

Icyumba gikonjesha kidakoresha umuriro Koperative KOTIBANYA yubakiwe na AGRIRESEARCH UNGUKA Ltd, mu karere ka Rubavu


Niyomugabo Alice, umunyamuryango wa KOTIBANYA, avuga ko bari basigaye bahura n'igihombo kinini kuko bamenaga cyane imboga zabaga zabapfanye. Ariko ko kuva batangira gukoresha iyi firigo idakoresha umuriro yababereye igisubizo ndetse n'inyungu ikaba yarazamutse. 

AGRIRESEARCH UNGUKA Ltd ni kompani y'urubyiruko ikora ubushakashatsi n'iyamamazabuhinzi bigamije isoko iherereye mu Rwanda, mu ntara y'amajyaruguru mu karere ka Musanze. Izwiho cyane guhanga udushya n'ikoranabuhanga bifasha abahinzi kongera umusaruro no gukora ubuhinzi buhangana n'imihindagurikire y'ikirere (Climate Smart Agriculture). 

[Indi nkuru wasoma: 2023 Isize he Ubuhinzi ku Bikorera: Kompani Z'urubyiruko 5 Ziyoboye Izindi mu Guteza Imbere Ubuhinzi mu Rwanda]

Kompani ya AGRIRESEARCH UNGUKA Ltd imaze kwegukana ibihembo bibiri byikurikiranya; ikigo cyambere mu bushakashatsi mu buhinzi n'ubworozi muri 2022 ndetse na Kompani y'urubyiruko iyoboye izindi muri 2023, mu imurikabikorwa ngarukamwaka ry'ubuhinzi n'ubworozi ritegurwa na Minisiteri y'ubuhinzi n'ubworozi mu Rwanda.

Innocent NIZEYIMANA, ushinzwe kwamamaza ibicuruzwa na serivisi muri AGRIRESEARCH UNGUKA Ltd avuga ko kuri ubu abahinzi benshi hirya no hino mu gihugu bifuza izi firigo ndetse ko bari no gukora intoya zabika kuva kubiro 10 kuzamura zakifashishwa mu rugo no mu kubacuruzi bato. Avuga ko kandi bari mu biganiro n'abandi bafatanyabikorwa mu kureba uko bahashya burundu ikibazo kiyangirika ry'umusaruro hifashishijwe uburyo buhendutse kandi butangiza ibidukikije. 

Firigo ntoya zidakoresha umuriro zibika imboga n'imbuto kugera kubiro 15 zakoreshwa mu rugo no kubacuruzi bato









Comments

Post a Comment

Popular Posts

2023 Isize he Ubuhinzi ku Bikorera: Kompani Z'urubyiruko 5 Ziyoboye Izindi mu Guteza Imbere Ubuhinzi mu Rwanda

-
Image
  Mu Rwanda, ubuhinzi buracyaza kw'isonga mu kubeshaho abaturage benshi aho abarenga 63% by'abaturage bose batunzwe nabwo. Ibi bishimangira uko ubuhinzi ari ingenzi mu ubukungu n'iterambere ry'igihugu muri rusange. Nyamara nubwo bimeze bityo igabanuka ry'ubutaka buhingwaho  ahanini bitewe n'ubwiyongere bukabije bw'abaturage, ingaruka z'imihindagurikire y'ikirere no kugunduka k'ubutaka n'izimwe mu mbogamizi zikomeye zituma umusaruro w'ibikomoka k'ubuhinzi ukiri hasi cyane. Serivisi z'iyamamazabuhinzi zihamye kandi zinoze zigizwe no kwigisha abahinzi gukora ubuhinzi bwa kijyambere kandi buhangana n'imihindagurikire y'ikirere, ni kimwe mu bisubizo birambye ku kibazo cy'umusaruro muke n'iterambere ry'ubuhinzi muri rusange. Ntagihe kinini gishize, gutanga izi serivisi bigenda gahoro gahoro byegurirwa abikorera. Muri uyu mwaka ushize wa 2023, tugiye kurebera hamwe urutonde rwa kompani ziyoboye izindi kandi zitanga i...
Read more

Umusaruro w’ubuhinzi ugiye kwikuba: Bimwe mu bidasanzwe byamuritswe n’ikigo cy’urubyiruko cyegukanye igikombe cy’imurikabikorwa ry’ubuhinzi n’ubworozi kunshuro ya 16

-
Image
  Hagati ya tariki 20-29 Kanama 2023, Ku Mulindi mu Karere ka Gasabo, habereye imurikabikorwa ry’ubuhinzi n’ubworozi ryateguwe na minisiteri y’ubuhinzi n’ubworozi, MINAGRI kunshuro yaryo ya 16. Imurikabikorwa ry’uyu mwaka ryari rifite insanganyamatsiko igira iti “Kuvugurura ubuhinzi n’ubworozi binyuze mu ikoranabuhanga, guhanga ibishya n’ishoramari”. Ni imurikabikorwa ryitabiriwe n’abamurikabikorwa bagera kuri 400 baturutse mu bihugu bigera kuri 16. Mu isozwa ry’iri murikabikorwa hahembwe abahize abandi mu kumurika mu byiciro bitandukanye. AGRIRESEARCH UNGUKA Ltd, ikigo cy’urubyiruko gikora ubushakashatsi n’iyamamazabuhinzi bigamije isoko, cyaturutse mu karere ka Musanze, nicyo kigo cy’urubyiruko cyahize ibindi cyegukana igihembo cy’abamuritse neza. Bimwe mu bidasanzwe AGRIRESEARCH UNGUKA Ltd yamuritse, harimo ikoranabuhanga ryitwa SmartInput, ikoranabuhanga rikomatanyije serivisi z’iyamamazabuhinzi zifasha abahinzi gukora ubuhinzi bwa kijyambere kinyamwuga. Rifite uburyo bufas...
Read more

UBUHINZI BW'URWANDA MU CYEREKEZO 2050

-
Image
  Ubuhinzi Bubyara Ubukire Mu myaka 20 ishize, ubuhinzi bwagize uruhare rukomeye mu izamuka ry’ubukungu no mu igabanuka ry’ubukene. Kuba Abanyarwanda begera 70% batunzwe n’ubuhinzi nabwo bukaba bwinjiza kimwe cya gatatu cy’umusaruro mbumbe w’imbere mu Gihugu, nta gushidikanya ko buzakomeza kugira uruhare rukomeye muri urwo rwego mu myaka 30 iri imbere. Ubuhinzi bufite uruhare runini ku byerekeranye n’umutekano w’ibiribwa, imirire, ibyoherezwa mu mahanga, kandi bufite isano ya bugufi n’urwego rw’inganda n’urwa za serivisi.  Urwego rw’ubuhinzi rwagize uruhare rungana na bibiri bya gatatu mu bijyanye no kugabanya ubukene mu gihe cy’Icyerekezo cya 2020. Twerekeje mu 2050, hazabaho iterambere mu rwego rw’ubuhinzi bigizwemo uruhare n’abahnzi babigize umwuga, barimo abagabo n’abagore, bazaba bita ku buhinzi bujyanye n’uruhererekane nyongeragaciro rw’ibikorwa by’inganda n’ubucuruzi. Ubuhinzi bugezweho bugamije isoko kandi bushobora guhangana n’imihindagurikire y’ibihe  Kugira ngo...
Read more